Қарағанды облысында 80 жастағы қария әлі күнге дейін ауыр техниканы еркін меңгеріп, еңбектің алдыңғы шебінде жүр. Тойбек Оспанов – жарты ғасырдан астам уақытын жер кәсібіне арнаған дала еңбеккері. Жас механизаторлар жөндей алмай қиналған техниканы қария бір сәтте іске қосады.
Тойбек Оспановтың жастық шағы да, кейінгі бүкіл өмірі де еңбекпен тығыз байланысты. 65 жыл бойы жүк көлігінің тізгінін ұстап келеді. Қазір жаз бойы шабылған шөпті КамАЗ-ымен елге жеткізіп беруде.
«Биік көлікке мініп, тізгінін қолыма алған сәттен-ақ бір серпіліп қаламын. Оның өзіне көтеріліп-мініп, қайта түсудің өзі — кәдімгі спорт секілді. Осындай сәттерден кейін бойым сергіп, өзімді ерекше жеңіл сезінемін. Әсіресе кең далада еркін жүру, қозғалыстың ырғақтарын сезіну жанымды жадыратып, көңіліме қуат береді», — дейді Тойбек Оспанов.
Таңертеңнен бастап Тойбек шөп тасиды, кешке қарай К-700 тракторына отырып, жер жыртып шығады. Топырақты 25–30 сантиметрге дейін қопсытып, келер көктемге дайындайды. Бұл – жердің құнарын арттырып, ауа мен судың өтуін жақсартатын маңызды жұмыс. Оған қоса зиянкестер мен арамшөп тұқымдарын жояды.
«Мен босқа қол қусырып отыра алмайтын адаммын. Маған әрдайым қозғалыс, қимыл керек. Қолымнан келетін іс болса, күш-қуатым тасып тұрғанда неге көмек көрсетпеске? Біреуге пайдаң тиіп, жақсылық жасасаң — өзің де жеңілдеп, рухани байисың. Оның үстіне адамдармен араласасың, жаңа дүниелер үйренесің, өмірдің өзін сезінесің. Ал үйде теледидар қарап немесе телефон шұқылап уақыт өткізуден не пайда? Өмір белсенділікті жақсы көреді, мен де соның өзінен қуат аламын», — дейді зейнеткер.
Тиышжан Қайроллақызы, Тойбек Оспановтың жұбайы:
«Көктемнің лебі сезіле бастаған сәттен-ақ Тойбектің көңіл күйі ерекше көтеріледі. Егістік алқабына шығуға алдын ала дайындалып, техникасын қарап, барлығын реттеп қояды. Дала жұмысы басталса, тіпті шабыттанып, тракторына отырып, жер жыртып, шөп шауып, кең аспан астында еңбек етуді ерекше ләззатпен орындайды. Кешкісін жұмыстан оралғанда көп адам шаршап келсе, Тойбек керісінше сергіп, қуанып келеді. Үйге кірген соң да қол қусырып отырмай, барлық шаруаны өзі тындырады».
80 жастағы қария «Нұр» шаруа қожалығында әлі де механизатор болып еңбек етеді. Бұзылған алып техникалардың да тілін табады. Көлігі бұзылған жүргізушілердің бас тіреп баратын жері де — осы ақсақалдың үйі.
«Техника жөндегенді ерекше жақсы көремін. Жылдар бойы талай дүниеге көз үйретіп, қол жаттықтырдым. Қазір көліктің дыбысына құлақ ассам болды, қай жерінде ақау бар екенін бірден аңғарамын. Әрбір тырс еткен үн, әрбір сәл өзгерген діріл маған бәрін айтып тұрғандай. Сондықтан болар, саймандарым мен кілттерім әрдайым жанымда жүреді. Жолда болсын, үйде болсын, далада болсын — кез келген техниканы ашып, қарап, жөндеп беруге дайынмын», — дейді механизатор.
Ол егін жинау науқанында да қырдағы қызу жұмысқа серпін беріп жүр. Заманауи комбайндарды да меңгеріп алған. Соның жемісі — жыл сайын өнім көлемі артып келеді.
Тойбек Оспанов еңбекпен ерте есейіп, 15 жасында алғаш рет ДТ-54 маркалы тракторды тізгіндеді. Жер жыртып, шөп шауып, науқандық жұмыстарға белсене қатысқан. Алып техникалардың барлығын меңгеріп, ауыл шаруашылығы саласының озаты атанды.
«Дала жұмысы мені ерекше рахатқа бөлейді. Кең құлаш жайған аспан астында, самал жел тербеткен ұлан-ғайыр алқапта еңбек етудің өзі жанға жайлылық сыйлайды. Топырақтың иісі, табиғаттың тынысы, техника гүрілі — бәрі маған қуат береді. Еңбекпен тер төккен сайын ішім жеңілдеп, ойым тазарады. Далада жүріп атқарған әр іс өзіме бір қуаныш, бір шабыт болып қайтады», — дейді Тойбек Оспанов.
Ол ешқашан дәрі ішіп, сырқаттанып көрмеген. Сондықтан болар, осы тынымсыз тіршілігін тоқтатпақ емес. Ендігі мақсаты — үш баласынан тараған немере-шөберелерін дәл осы еңбекқорлық рухында тәрбиелеу.
