Қарағандылық Нұрдәулет Жансейітов 9 адамды өрттен аман алып қалды. Бұқар Жырау даңғылында 9 қабатты үйді шарпыған қызыл жалын кезінде өрт сөндірушілерді дер кезінде шақырған.
Нұрдәулет Жансейітов өртпен арпалысқан сәтін ерекше еске алады. Қара түтінді көргенде ойланбастан оқиға орнына барғанын айтады. Тұрғындардың есігін қағып, сыртқа шығуға көмектескен. Оған әлі күнге дейін алғысын білдіріп, ерлігін елеп жатқандар көп.
«Мен жүгіріп 9 қабатқа жеткен соң, адамдармен бірге төменгі қабатқа түсе бастадым. Сосын подъезде қарттар мен мүгедектігі бар жандар бар ма деп сұрастырдым. 10 шақты пәтерде адам бар екенін білдім. Дереу сол үйлерге барып, тұрғындарды алып шықтым», — қала тұрғыны Нұрдәулет Жансейітов.
Нұрдәулет Жансейітов 14 жыл Президенттік полкте қызмет еткен. Төтенше жағдайда әрекет ету жолдары, алғашқы медициналық көмек көрсетуді сонда үйренген. Дәл осы тәжірибенің арқасында 9 адамды өлімнен арашалап қалды.
«Қызмет барысында бізді сабырлы болуға үйретті. Тактикалық медицинаның барлық түрлерін меңгердік. Кез келген жағдайда әрекет етуге дайын болдық. Сүңгуірлік жұмыстан бастап, десантқа дейінгі тапсырмаларды орындадық. Егер осы өмір мектебі болмағанда, қазір не істеп жүрерімді білмеймін. Бұл маған өмірде үлкен көмегін беруде», — дейді Нұрдәулет Жансейітов.
Бейбіт күннің батыры Қарағанды облысы Төтенше жағдайлар департаментінің сыйлығымен және алғысхатымен марапатталды.
Өрт сөндірушілер қызыл жалыннан 32 адамды құтқарды. Жеделсатының көмегімен 2 адамды алып шықты. Көміртегі тотығымен уланған 3 тұрғын ауруханаға жеткізілді. Нұрдәулет Жансейітовтің әрекеті — тек батылдық емес, өмірлік қағидаға айналған ұстанымның көрінісі, — дейді тұрғындар.
