Қарағанды облысында тұтас ғұмырын кенішпен байланыстырған әулет тұрады. Чернобайлар әулетінің еңбек өтілі 150 жылдан асады. Бірнеше буын өкілі еліміздегі ірі өндіріс ошақтарының бірі – «Qarmet» металлургиялық комбинатында тер төгіп келеді.
Көпшілік үшін «ауысым» – жай ғана жұмыс уақыты. Ал Чернобайлар отбасы үшін ол – өмір салты. Әулет шежіресі Сергей Чернобайдан бастау алады. Ол – кәсіби кенші. Еңбек жолын осыдан қырық жыл бұрын, он сегіз жасында, «Шахтинская» шахтасында бастаған. Қазір – конвейерлік тасымал учаскесінің бастығы. Бұл – кеніштің нағыз күретамыры. Конвейердің тоқтаусыз жұмыс істеуі ауысым ырғағына да, қауіпсіздікке де тікелей әсер етеді. Лавалардан алынған көмірдің бәрі осы таспалар арқылы өтеді.
Сергей ЧЕРНОБАЙ – конвейерлік тасымал учаскесінің бастығы
Әскерден келген соң бірден шахтаға орналастым. 1984 жылдан бері тау-кен өндірісінде жұмыс істеп келемін. Ал Шахтинскке 1985 жылы монтажшы болып келдім. Мен тағдырыма ризамын: екі ұлым да, әйелім де осында.
Сергей Петровичтің еңбек жолы – жарты ғасырға жуық. Қарапайым жер асты жұмысшысынан басшылыққа дейін өскен. Қазір оның жары мен ұлдары да сол дәстүрді жалғап, бір кәсіпорында еңбек етіп жүр.
Юрий ЧЕРНОБАЙ – конвейерлік тасымал учаскесінің көмекшісі
Кеншілер әулетінен шыққаным мен үшін үлкен абырой. Әкем осы кеніште 41 жылдан бері еңбек етіп келеді. Мектеп кезінен-ақ оның ізін жалғайтынымды білдім. 9-сыныпты аяқтай сала колледжге түстім. Оқуды бітіргеннен кейін осында жұмыс істей бастадым.
Кіші ұлы Юрий әкесімен иық тірестіре бір учаскеде жұмыс істейді. Үлкені Станислав та әулет жолын жалғаған. 2006 жылы еңбек жолын жер асты кеншісі болып бастады. Бүгінде – тау-кен шебері.
Станислав ЧЕРНОБАЙ – тау-кен шебері
Әулеттен шыққанымды өмір бойы мақтан етемін. Бала кезімнен кенші болуды армандадым. Сол мақсаттың жетегімен Қарағанды политехникалық колледжіне түстім. 2006 жылдан бері осы шахтада еңбек етіп келемін.
Жұбайы Наталья Чернобай да осы шахтада қызмет етеді. Еңбек өтілі – жиырма жыл. Ол – көтергіш қондырғының машинисі. Оның міндеті – жер қойнауынан жүздеген метр тереңдіктен көмірді дер кезінде, дәл және қауіпсіз шығару. Натальяның жұмысына ауысымның өнімділігі ғана емес, шахтадағы қауіпсіздік те тікелей байланысты.
Наталья ЧЕРНОБАЙ – көтергіш қондырғы машинисі
Мен осы жерде отырып машинаны тоқтатамын, жылдамдығын реттеймін. Кенші болу оңай емес. Тіпті олардың киім ауыстырып, жер астына түсуінің өзі үлкен еңбек. Әрине, әркез уайымдап отырамыз. Дабыл қағылса, жүрегім атқақтап, шыққанша тыным таппай күтемін.
Биыл өңірдегі өндіріс көлемі былтырмен салыстырғанда 11,7%-ға артты. Жалпы Қарағанды облысында 8 кеніш бар. Онда шамамен 16 мың кенші еңбек етеді.
