Қарағанды облысына қарасты Қарқаралы ауданында ретро машиналар топтамасынан жаңа көлік құрастыратын автоәуесқой тұрады. Еркін Тәшібаев ауыл шаруашылығына таптырмас техниканың бірнешеуін ойлап тапқан. Көліктің дизайнын өзі сызады. Ол сыртқы келбетіне ғана емес, сапасына да мән береді.
Еркін Тәшібаев жаңа автомобиль құрастырып жатыр. Қозғалтқышы мен дөңгелектері УАЗ көлігінен алынған. Рөлі «Волгадан», ал негізгі қаңқасы ГАЗ-69 темірінен жиналған.
«Бұл – ГАЗ-69 көлігі. Мен оны Қарқаралыдан зейнеткерден сатып алдым. Кузовы жақсы сақталғандықтан, дәл осы көлік маған ұнады. Алайда мен қозғалтқышын ауыстырамын. Инжекторлы мотор орнатамын. Бұрын беріліс қорабы үш жылдамдықты болса, енді төрт болады. Мосттары заманауи. Ұзақ жолға шыға алады. Мен бұған ерекше назар аудардым, себебі ұзақ қашықтыққа жиі жүруге тура келеді», – дейді шебер Еркін Тәшібаев.
Автоәуесқой үш көліктің қосындысынан жаңа заманауи техника жасауда. Ішіне алты адам еркін сыяды. Ұзақ жолға өте ыңғайлы.
«Қазір тек сымдарды ішке жасыру ғана қалды. Одан кейін орындықтарды орнатамын. Содан соң еденді және карданды жабамын. Сонда машина толығымен дайын болады», – дейді шебер.
Бұл «Арлан» деп аталатын өнертапқыштың алғашқы жұмысы. Техника жол талғамайды: батпақта, қарлы жерде, мұз үстінде еркін жүреді.
«Мен бұл машинаны ГАЗ-66-дан жасадым. Оны бөлшектеп, тек көпірін ғана пайдаландым. Қозғалтқышты ЗИЛ-ден алдым. Ал сыртқы қаптамасын да сол жерден алдым. Нәтижесінде пикап шықты. Көп адамдар бұл машинаға қызығушылық танытты. Соңында оны сатып алды. Машина өте көрікті болды», – дейді Еркін Тәшібаев.
Оның мамандығы – механизатор. Кәсіптік-техникалық училищенің түлегі. Алғашқы автомобилін небәрі 23 жасында құрастырған.
«Балалық шағымнан техникаға деген қызығушылығым ерекше болды. Велосипедтен мопед жасап шығарғаным есімде. Сол кезден бастап әртүрлі құрылғыларды жөндеуге, жинақтауға әуестендім. Көптеген ойыншық тракторларды құрастырып, оларды іске қосуға тырысатынмын. Қиындыққа қарамастан, істі соңына дейін жеткізбейінше, үйге қайтпайтынмын. Міне, сол табандылық пен қызығушылық мені бүгінгі жетістіктеріме жеткізді», – дейді ол.
Бұл тракторды шебер шағын шаруашылығы үшін жасаған. Техника қора-жайға оңай сыйып кетеді. Қыстыгүні төрт түліктің жем-шөбін тасуға, қи шығаруға қолайлы.
«Бұл трактор өте қолайлы әрі ең бастысы – үнемді. Ол ауа салқындату жүйесімен жабдықталған. Қозғалтқышы оңай әрі бірден іске қосылады. Оған, әсіресе, қыс айларында алаңдамайсың — тоңып қалу деген болмайды», – дейді шебер Еркін Тәшібаев.
Автоәуесқой Қарқаралыдағы ұлттық табиғи паркте инспектор болып жұмыс істейді. 22 жыл бойы орманның қауіпсіздігін бақылап, тазалығын сақтап келеді.
