Қарағанды облысының Теміртау қаласында металлургия саласына бір жарым ғасырдан астам уақытын арнаған еңбек әулеті бар. Лугановтар отбасы бүгінде әріптестеріне ғана емес, қоғамға үлгі болып отыр. Ауысым басталысымен өндірістегі ахуал пысықталып, жауапты мамандар өзара кеңеседі. Кейін ұжыммен күндік міндетті нақтылап, жұмыс барысын үйлестіруге кіріседі. Евгений Луганов үшін бұл – соңғы 15 жылдан бері қалыптасқан күнделікті еңбек ырғағы.
Лугановтар әулеті үшін металлургия – жай ғана мамандық емес, ұрпақтан-ұрпаққа жалғасқан өмір жолы. Әулеттің өндірістегі жалпы еңбек өтілі – 157 жыл. Комбинатта Евгенийдің ата-анасы, туыстары мен жиені де еңбек етеді. Ал өзі еңбек жолын көпірлі кран машинисі болып бастап, 12 жылдан астам осы қызметте жұмыс істепті. Кейін аға бригадир атанып, бүгінде өнім жөнелту шебері ретінде үлкен ұжымға жетекшілік етеді.
Қазір Евгений Лугановтың қарамағында 32 қызметкер бар. Олар дайын өнімнің сапалы қапталып, белгіленген мерзімде тұтынушыға жөнелтілуіне жауап береді. Тұрмыстық мақсаттағы және өндірістік қолданысқа арналған металл өнімдері, рулон және табақша болат, ақ қаңылтыр – мұның бәрі осы цехта дайындалып, әлемнің әр түкпіріне жол тартады.
Бұл бөлім ай сайын 9–10 мың тоннаға дейін өнім жөнелтеді. Оның 4 мың тоннасы – ақ қаңылтыр, ал 6 мың тоннасы – құрылымдық болат өнімдері.
Өндірістегі жауапты қызметімен қатар Евгений Луганов комбинаттың қоғамдық өміріне де белсенді араласады. Ол еңбек адамының ел дамуына қосатын үлесі ерекше деп есептейді.
Күн сайын мыңдаған тонна өнімнің сапалы әрі уақытылы жөнелтілуіне үлес қосып жүрген Евгений Луганов үшін ең үлкен марапат – еңбектің нәтижесін көру. Ал жас мамандарға айтары біреу. Еңбекке адалдық пен жауапкершілік – нағыз металлургке тән қасиет. Лугановтар әулетінің өнегелі жолы осының айқын дәлелі. Бір жарым ғасырдан астам уақыт бойы өндірістің дамуына үлес қосып келе жатқан әулет бүгін де еңбек дәстүрін лайықты жалғастырып келеді.
